سىزنىڭ ئورنىڭىز :باش بەت >>تېكىست

شى جىنپىڭنىڭ مۇھىم ئەسىرى ‹‹نامراتلىقتىن قۇتۇلدۇرۇش›› ناملىق كىتابنىڭ ئىنگلىزچە، فىرانسۇزچە نەشرى دۆلەت ئىچىدە تۇنجى قېتىم تارقىتىلدى

مۇھەررىر: مەريەمگۈل
مەنبەسى: شىنجاڭ گېزىتى
يوللانغان ۋاقىت: 2017-08-24

    شىنخۇا ئاگېنتلىقى، بېيجىڭ، 8–ئاينىڭ 23–كۈنى تېلېگراممىسى. جۇڭگو چەت ئەل تىلى ئىدارىسى قارىمىقىدىكى چەت ئەل تىلى نەشرىياتى تەرجىمە ۋە نەشر قىلغان ‹‹نامراتلىقتىن قۇتۇلدۇرۇش›› ناملىق كىتابنىڭ ئىنگلىزچە، فىرانسۇزچە نەشرى 8–ئاينىڭ 23–كۈنى 24–نۆۋەتلىك بېيجىڭ خەلقئارا كىتاب يەرمەنكىسىدە دۆلەت ئىچىدە تۇنجى قېتىم تارقىتىلدى.

    ‹‹نامراتلىقتىن قۇتۇلدۇرۇش›› ناملىق كىتاب ج ك پ مەركىزىي كومىتېتىنىڭ باش شۇجىسى، دۆلەت رەئىسى، مەركىزىي ھەربىي كومىتېتنىڭ رەئىسى شى جىنپىڭنىڭ شەخسىي ئەسىرى بولۇپ، كىتابقا شى جىنپىڭنىڭ 1988–يىلىدىن 1990–يىلىغىچە ج ك پ نىڭدې ۋىلايەتلىك پارتكومنىڭ شۇجىسى بولغان مەزگىلدىكى مۇھىم سۆزى ۋە تەكشۈرۈپ تەتقىق قىلىش ماقالىسىدىن 29ى كىرگۈزۈلگەن. بۇنىڭدىن باشقا، يەنە شى جىنپىڭنىڭ نىڭدېدا خىزمەت قىلغان مەزگىلدىكى 6 خىزمەت سۈرىتىنى ئۆز ئىچىگە ئالغان 10 پارچە رەڭلىك سۈرىتى كىرگۈزۈلگەن.

    كىتابتا شەرقىي فۇجيەن رايونىنىڭ قانداق قىلىپ نامراتلىقتىن قۇتۇلۇپ بېيىپ، تېز تەرەققىي قىلغانلىقىدىن ئىبارەت باش تېما زىچ چۆرىدىلىپ، بىر قاتار تۈزۈم، ئىدىيە، نۇقتىئىنەزەر ۋە ئۇسۇللار ئوتتۇرىغا قويۇلغان، شەرقىي فۇجيەن رايونىنىڭ ئىقتىسادىي، ئىجتىمائىي تەرەققىياتىنى ئىلگىرى سۈرۈشتىكى زور نەزەرىيەۋى ۋە ئەمەلىي مەسىلىلىرىگە چوڭقۇر جاۋاب بېرىلگەن. بۇ كىتاب ئىقتىسادىي، سىياسىي، مەدەنىيەت، ئىجتىمائىي قۇرۇلۇش، ئېكولوگىيە مەدەنىيلىكى قۇرۇلۇشى ۋە پارتىيە قۇرۇلۇشى قاتارلىق مۇھىم مەزمۇنلارغا چېتىلىدۇ، ئۇنىڭدىكى ئىدىيە مول ۋە چوڭقۇر، يېزىقچىلىق ئۇسلۇبى جانلىق ۋە سەمىمىي، ناھايىتى يۇقىرى نەزەرىيەۋى قىممەتكە ئىگە بولۇپ، باش شۇجى شى جىنپىڭنىڭ پارتىيە 18–قۇرۇلتىيىدىن بۇيانقى بىر قاتار مۇھىم سۆزىنىڭ روھى بىلەن تومۇرداش ھەم ئۆزئارا ماس كېلىدۇ. شۇنىڭ بىلەن بىللە، بۇ كىتاب يولداش شى جىنپىڭنىڭ نىڭدېدا ئىككى يىل جاپالىق خىزمەت قىلغانلىقىنىڭ ئومۇمىي كارتىنىسى بولۇپ، ئۇنىڭدا شى جىنپىڭنىڭ جاپالىق رايونلاردا چوڭقۇر يىلتىز تارتىپ، ئاممىنى نامراتلىقتىن قۇتۇلۇشقا يېتەكلەشتىكى قەتئىي غايە–ئېتىقادى ۋە خەلق ئۈچۈن خىزمەت قىلىشتىكى چوڭقۇر ۋە سەمىمىي ھېسسىياتى گەۋدىلەنگەن. بۇ كىتابنىڭ خەنزۇچە نەشرىنى فۇجيەن خەلق نەشرىياتى 1992–يىلى 7–ئايدا 1-قېتىم نەشر قىلغان، 2014–يىلى 8–ئايدا قايتا نەشر قىلغان، دۆلەت ئىچىدىكى ئوقۇرمەنلەر، بولۇپمۇ ھەر دەرىجىلىك رەھبىرىي كادىرلارنىڭ قىزغىن ئالقىشىغا ئېرىشكەن.

    تۇنجى تارقىتىش پائالىيىتىگە قاتناشقان دۆلەت ئاخبارات–نەشرىيات–رادىيو–كىنو–تېلېۋىزىيە باش ئىدارىسىنىڭ مۇئاۋىن باشلىقى ۋۇ شاڭجى مۇنداق دېدى: پارتىيە 18–قۇرۇلتىيىدىن بۇيان يولداش شى جىنپىڭ يادرولۇقىدىكى پارتىيە مەركىزىي كومىتېتى نامرات ئاھالىلەرنى نامراتلىقتىن قۇتۇلدۇرۇشنى ئومۇميۈزلۈك ھاللىق جەمئىيەت بەرپا قىلىشتىكى تۆۋەن چەك ۋەزىپىسى ۋە بەلگە خاراكتېرلىك كۆرسەتكۈچ قىلىپ، ‹‹بەش بىر گەۋدە›› ئومۇمىي ئورۇنلاشتۇرمىسى ۋە ‹‹تۆت ئومۇميۈزلۈك›› ئىستراتېگىيەلىك ئورۇنلاشتۇرمىسىغا كىرگۈزۈپ، بىر قاتار زور ئىستراتېگىيەلىك ئورۇنلاشتۇرمىلارنى ئوتتۇرىغا قويۇپ، دۇنيا ئېتىراپ قىلىدىغان مۇۋەپپەقىيەتلەرنى قولغا كەلتۈردى، قىممەتلىك تەجرىبىلەرنى توپلىدى، شۇنداقلا باشقا دۆلەتلەرنىڭ نامراتلىقتىن قۇتۇلۇپ تەرەققىي قىلىشىنى پايدىلىق ئۆرنەك بىلەن تەمىنلىدى.

    جۇڭگو چەت ئەل تىلى ئىدارىسىنىڭ باشلىقى جاڭ فۇخەي مۇنداق دېدى: باش شۇجى شى جىنپىڭنىڭ نامراتلارنى يۆلەش، نامراتلىقتىن قۇتۇلدۇرۇش خىزمىتى توغرىسىدىكى ئىدىيەلىرىنى خەلقئارا جەمئىيەتكە چوڭقۇر تونۇشتۇرۇپ، تەرەققىي قىلىۋاتقان دۆلەتلەرنىڭ نامراتلىقتىن قۇتۇلدۇرۇش، نامراتلارنى ئازايتىش ساھەسىدە تەجرىبە ئالماشتۇرۇشىنى ئىلگىرى سۈرۈش ئۈچۈن، جۇڭگو چەت ئەل تىلى ئىدارىسى قارىمىقىدىكى چەت ئەل تىلى نەشرىياتى بىلەن فۇجيەن خەلق نەشرىياتى ھەمكارلىشىپ، ‹‹نامراتلىقتىن قۇتۇلدۇرۇش›› ناملىق كىتابنى ئىنگلىزچە ۋە فىرانسۇزچە نەشر قىلدۇردى ھەم دۇنياغا تارقاتتى. بۇ كىتاب نەشر قىلىنىشى بىلەنلا خەلقئارا جەمئىيەتتە قىزغىن ئىنكاس قوزغىدى.

    گىۋىنېيەنىڭ جۇڭگودا تۇرۇشلۇق باش ئەلچىسىنىڭ پەۋقۇلئاددە ۋەكىلى، سىياسىي، مەدەنىيەت مەسلىھەتچىسى با دىخېرنو مادېرۇ مۇنداق دېدى: بۇ كىتاب گىۋىنېيەنىڭ نامراتلىقتىن قۇتۇلۇشى، ئىقتىسادنى تەرەققىي قىلدۇرۇشىنى مۇھىم تەپەككۇر ۋە چارە بىلەن تەمىنلەيدۇ، شۇنداقلا بۇ ئارقىلىق گىۋىنېيەنىڭ جۇڭگو بىلەن بولغان ئەنئەنىۋى دوستلۇقىنى يەنىمۇ مۇستەھكەملىگىلى بولىدۇ.

    ئىگىلىنىشىچە، ‹‹نامراتلىقتىن قۇتۇلدۇرۇش›› ناملىق كىتابنىڭ ئىنگلىزچە، فىرانسۇزچە نەشرى تەرجىمە قىلىنىپ نەشر قىلىنغاندىن كېيىن، ئافرىقىدا ئۆتكۈزۈلگەن نامراتلارنى ئازايتىش، تەرەققىيات يۇقىرى دەرىجىلىكلەر مۇنبىرى ۋە ئاقىللار ئامبىرى ئالماشتۇرۇش پائالىيەتلىرىدە تۇنجى بولۇپ كۆرگەزمە قىلىنىپ، ئافرىقىدىكى ھەرقايسى دۆلەتلەرنىڭ سىياسىي ئەربابلىرى، ئالىملار ۋە تاراتقۇلارنىڭ يۈكسەك دىققىتىنى قوزغىغان ھەم ئالقىشىغا سازاۋەر بولغان.

[مەريەمگۈل]
010020070830000000000000011100001365518421